Rigorously curated citable Latin texts
title. EQUUS TROIANUS.
Achiui cum per decem annos Troiam capere non possent, Epeus monitu Mineruae equum mirae magnitudinis ligneum fecit, eo-que sunt collecti Menelaus Ulixes Diomedes Thessander Sthenelus Acamas Thoas Machaon Neoptolemus; et in equo scripserunt DANAI MINERUAE DONO DANT, castra-que transtulerunt Tenedo.
id Troiani cum uiderunt arbitrati sunt hostes abisse; Priamus equum in arcem Mineruae duci imperauit, feriati-que magno opere ut essent edixit; id uates Cassandra cum uociferaretur, inesse hostes, fides ei habita non est.
quem in arcem cum statuissent et ipsi noctu lusu atque uino lassi obdormissent, Achiui ex equo aperto a Sinone exierunt et portarum custodes occiderunt, socios-que signo dato receperunt et Troia sunt potiti.
| previous: 107a | next: 109a |