Rigorously curated citable Latin texts
t1. QUAE PIISSIMAE FUERUNT VEL PIISSIMI.
1t1. Antigona Oedipi filia Polynicen fratrem sepulturae dedit. Electra Agamemnonis filia in fratrem Orestem. Iliona Priami filia in fratrem Polydorum et parentes.
2t1. Pelopia Thyestis filia in patrem, ut eum uindicaret. Hypsipyle Thoantis filia patri, cui uitam concessit. Chalciope Aeetae filia patrem non deseruit regno amisso. Harpalyce Harpalyci filia in bello patrem seruauit et hostem fugauit.
3t1. Erigone Icari filia patre amisso suspendio se necauit. Agaue Cadmi filia in Illyrica Lycothersen regem interfecit et patri suo regnum dedit. Xanthippe Myconi patri incluso carcere lacte suo alimentum uitae praestitit. Tyro Salmonei filia propter patrem filios suos necauit.
t2. QUI PIISSIMI FUERUNT.
4t2. In Sicilia cum Aetna mons primum ardere coepit, Damon matrem suam ex igne rapuit, item Phintia patrem. Aeneas item in Ilio Anchisem patrem umeris et Ascanium filium ex incendio eripuit.
5t2. Cleops et Bitias Cydippae filii. Cydippe sacerdos Iunonis Argiuae cum boues in pastionem misisset neque ad horam qua sacra in monte ad templum Iunonis duci et fieri deberent apparerent et essent mortui, quae nisi ad horam sacra facta essent, sacerdos interficiebatur;
6t2. inter quam trepidationem Cleops et Bitias pro bubus sub iugo se iunxerunt et ad fanum sacra et matrem Cydippen in plaustro duxerunt; sacrificio-que peracto Cydippe precata est Iunonem, si sacra eius caste coluisset, si filii aduersus eam pii fuissent, ut quicquid bonum mortalibus posset contingere, id filiis eius contingeret.
7t2. precatione peracta plaustrum et matrem filii domum reduxerunt et fessi somno acquieuerunt . . . . . . at Cydippe diligenter agnouit nihil esse melius mortalibus quam mori, et ob hoc obiit uoluntaria morte.
| previous: 253_237 | next: 255_237 |