Rigorously curated citable Latin texts
greeting. C. PLINIUS PONTIO SUO S.
Scio quae tibi causa fuerit impedimento, quominus praecurrere adventum meum in Campaniam posses. Sed quamquam absens totus huc migrasti: tantum mihi copiarum qua urbanarum qua rusticarum nomine tuo oblatum est, quas omnes improbe, accepi tamen.
Nam me tui ut ita facerem rogabant, et verebar ne et mihi et illis irascereris, si non fecissem. In posterum nisi adhibueritis modum ego adhibebo; et iam tuis denuntiavi, si rursus tam multa attulissent, omnia relaturos.
Dices oportere me tuis rebus ut meis uti. Etiam: sed perinde illis ac meis parco. Vale.
| previous: 6.27 | next: 6.29 |